नरजन तामाङ
हुम्ला- हुम्लाको ताजाँकोट गाउँपालिका-३ स्थित धर्मोदय माध्यमिक विद्यालयमा भवन अभाव हुदाँ अधुरो भवनको भुइँमा बसेर विद्यार्थी पढ्दै आएका छन ।
ठेकेदारको चरम लापरबाहीले भवन निर्माणमा ढिलासुस्ती गरेपछि भवन हुदाँ विद्यार्थी अधुरो भवनको भुइँमा बसेर पढ्न बाध्य भएका हुन । २०७८ सालको असार मसान्तसम्म निर्माण सम्पन्न हुनुपर्ने भवन प्रसान्त निर्माण सेवा र बाबुराम कन्स्ट्रक्सन निर्माण सेवाको लापरबाहीले विद्यार्थीलाई पठनपाठनमा समस्या भएको हो ।
भवन निर्माण नभएपछि भुइँमा पढ्दै आएको कक्षा ६ छात्रा सुविधा शर्माले दुखेसो गरिन । कक्षा कोठा नहुदाँ सरहरूले यतै राखेर हामीलाई पढाउनु हुन्छ- शर्माले भनिन् ।
“भवन छैन । गत वर्षको बाढीले भवन पुरिदिएपछि भवनको अभाव भएकोले हामीहरु भुइमै बसेर पढ्दै आएका छौँ”- कक्षा ६ मा अध्ययनरत छात्र जसबहादुर सुनार बताउँछन ।
ठेकेदारहरूले समयमै सम्पन्न नगरेपछि ४० लाखको चार कोठे भवन र ५० लाखको पाँच कोठे भवन दुई वर्षदेखि अधुरै छन ।
४० लाखमा चार कोठे भवनको जिम्मा पाएको प्रसान्त निर्माण सेवाका प्रोपाइटर नन्दखर जैसीले चुनावका कारण भवन निर्माण ढिलासुस्ती भएको बताए ।
काठहरू संकलन भइसकेको अब १५ गतेभित्र सम्पन्न गर्ने जैसीले दावी गरे ।
५० लाखमा पाँचकोठे भवनको जिम्मा लिएका बाबुराम कन्स्ट्रक्सन निर्माण सेवा यस विषयमा बेखवर देखिएको छ ।
धर्मोदय माध्यमिक विद्यालयका प्रधानाध्याक गंगादत जैशीका अनुसार गत वर्ष पहिरोले भवन नै पुरिदिएपछि समस्या आएको बताउनुहुन्छ ।।
