‘तेस्रो पक्ष हायर गर्दा कार्यालयका सूचना प्रविधिसम्बद्ध कर्मचारीले निरीक्षकका रूपमा काम गर्नुपर्छ,’ त्रिभुवन विश्वविद्यालयका सहप्राध्यापक एवं सूचना प्रविधि विज्ञ रोमकान्त पाण्डे भन्छन्, ‘आउटसोर्सिङ गर्ने चलन अन्य देशमा पनि छ । आउसोर्सिङ गर्दा कार्यालयका कर्मचारीले मोनिटरिङको जिम्मा लिन्छन् ।’ हामीकहाँ भने सावर्जनिक निकायका सूचना प्रविधिसम्बद्ध कर्मचारीलाई बिग्रेका कम्प्युटर बनाउने, नेटवर्कमा आएको समस्या सुल्झाउनेजस्ता प्राविधिक काममा अल्झाइने गरेको आईटी कर्मचारीहरूको गुनासो छ ।
सरकारले डिजिटल नेपाल, विद्युतीय सुशासन, कागजरहित प्रणाली आदिको परिकल्पना गरेको छ । यसका लागि सरकारी कार्यालयका सूचना प्रविधिसम्बन्धी जनशक्तिको भूमिका महत्त्वपूर्ण हुन्छ । तर डिजिटल प्रणालीबारे कुनै निर्णय लिँदा हार्डवेयर, सफ्टवेयरलगायत पूर्वाधार निर्माण वा खरिद गर्दा होस् या सूचना प्रविधिसम्बन्धी कुनै योजना बनाउँदा, कार्यालयका सूचना प्रविधि शाखाका कर्मचारीको राय–सुझाव नलिइने गरेको आईटी–कर्मचारीहरूको दाबी छ ।
यातायात व्यवस्था विभागका कम्प्युटर इन्जिनियर सन्तोष पोखरेललाई आफूहरूको दक्षताको सदुपयोग हुन नसकेको भन्ने लाग्छ । कार्यालयमा बिग्रेका प्रविधिको मर्मत–सम्भारमै दिन बित्ने गरेको उनले बताए । ‘हाम्रो कार्यालयमा जम्मा दुईजना कम्प्युटर इन्जिनियर छौं, प्रविधि जोडिएका सबै काम भ्याउनुपर्छ,’ उनले भने, ‘हाम्रो (पढाइ र दक्षताको) सदुपयोग नै हुन सकेको छैन ।’ प्रशासन र आईटीको कर्मचारी एउटै पदको भए पनि आईटीका कर्मचारीलाई अलि तल्लो जस्तो व्यवहार गरिने युवा तथा खेलकुद मन्त्रालयका कम्प्युटर अपरेटर विनय भण्डारीको गुनासो छ ।
